Shqipëria pritet të ketë më pak bashki në zgjedhjet vendore të vitit 2027
Reforma territoriale parashikon reduktimin e numrit të bashkive, me synimin për të rritur cilësinë e shërbimeve dhe eficiencën e pushtetit vendor.
Shqipëria pritet të hyjë në zgjedhjet vendore të vitit 2027 me një hartë të re administrative. Bashkëkryetari i Komisionit të Reformës Territoriale, Arbjan Mazniku, konfirmoi se ulja e numrit të bashkive është tashmë një objektiv i reformës, ndërsa modeli i ri do të bazohet në analiza ekonomike, demografike dhe funksionale.
Në një intervistë për Klan News, Mazniku tha se ekspertët kanë analizuar potencialin ekonomik të çdo territori, numrin e bizneseve, qarkullimin e tyre dhe ndryshimet demografike, me qëllim krijimin e një organizimi më efikas të pushtetit vendor.
Shërbimet mbeten kriteri kryesor
Sipas Maznikut, më shumë se gjysma e bashkive në vend nuk arrijnë të ofrojnë as gjysmën e shërbimeve që u takojnë sipas kompetencave ligjore. Ai pranoi se, edhe pse situata është përmirësuar ndjeshëm krahasuar me vitin 2014, niveli aktual nuk është i mjaftueshëm për të garantuar shërbime cilësore në të gjithë territorin.
Qëllimi i reformës është që bashkitë të mos kufizohen vetëm në mirëmbajtjen e infrastrukturës, por të shndërrohen në institucione që nxisin zhvillimin ekonomik të zonave që administrojnë.
Numri i bashkive ende nuk është përcaktuar
I pyetur nëse reforma do ta ulë numrin e bashkive në 30, Mazniku u përgjigj se ende nuk është vendosur një shifër konkrete. Sipas tij, kriteri kryesor do të jetë aftësia e bashkive për të ofruar shërbime, ndërsa në vlerësim do të merren parasysh edhe distancat gjeografike, si dhe faktorët socialë e kulturorë.
Ai theksoi se reduktimi i moderuar i numrit të bashkive përbën vetëm fazën e parë të reformës territoriale.
Reforma do të vijojë me tre faza të tjera
Pas rishikimit të hartës administrative, procesi do të vazhdojë me rishikimin e funksioneve të bashkive, reformën e financave vendore dhe krijimin e rajoneve si struktura bashkëpunimi ndërmjet njësive të pushtetit vendor.
Sipas Maznikut, organizimi rajonal është i lidhur edhe me përafrimin e Shqipërisë me standardet e Bashkimit Evropian, por kjo fazë do të realizohet në një etapë të mëvonshme.
Vendimi përfundimtar do të merret nga Kuvendi
Mazniku deklaroi se është e sigurt që zgjedhjet vendore të vitit 2027 do të zhvillohen me një numër më të vogël bashkish, ndërsa procesi do të shoqërohet me konsultime dhe diskutime publike përpara se Kuvendi të marrë vendimin përfundimtar.
Ai bëri të ditur gjithashtu se analiza është mbështetur në tre tregues kryesorë: indeksin e funksionalitetit të bashkive, indeksin e masës urbane dhe indeksin e performancës ekonomike. Sipas tij, disa bashki, përfshirë edhe në qarkun e Tiranës, rezultojnë me nivele të ulëta në këta tregues. Propozimet e reformës pritet të paraqiten në seancë plenare më 23 korrik.
k.jpg)